انا مدخن
باختيارى
بكامل حريتى
مش حاقولك بقى اصدقاء السوء والكلام الفاضى اللى الناس بتقولها دى
انا صحيت الصبح فى يوم و قررت ابقى مدخن
رحت كشك سجاير و اشتريت علبه سجاير وولاعه و شربت العلبه دى كلها فى نفس اليوم و من ساعتها بقيت مدخن
اكبر عدو ليا هو غير المدخنين مش كلهم الحقيقه الجهله من غير المدخنين الجهله اللى لسه مايعرفوش انى من حقى ادخن.
(انا لما بدخن باحرق فلوس (فلوسى
و صحتى اللى هى ثروه المجتمع اللى انا عايش فيه مظبوط
طيب فلوسى و انا اللى باكسبها بشغلى ومن حقى احرق جزء منها فى متعه انا بحبها حقى و ثروه المجتمع اللى هى صحتى بدفع فى مقابل حرقها
ده يعنى على اعتبار ان المجتمع صعبا ن عليه صحتى اوى او فارقه معاه
بس المهم انى انا بادفع فى مقابل كل علبه سجاير انا باحرقها خمس اضعاف تمنها يعنى انا باشرب سجاير مارلبورو تمنها 7.5 جنيه يعنى تمن السجاير + 500% ضرايب اولا شركه الشرقيه للدخان اللى بتصنع السجاير بتاخد من فيليب موريس صاحب العلامه التجاريه 41 جنيه فى الاف سجاره يعنى السيجاره بتتكلف كام ماتتعبش نفسك السيجاره بتتكلف 4 صاغ و العلبه بحالها تتكلف 80 قرش سجاير و قول بباقى الجنيه تغليف يعنى العلبه بتتكلف على فيليب موريس جنيه و بيكسب 150% يبقى 2.5 جنيه و الدوله بتحصل الخمسه جنيه الباقيه ضرايب يبقى المجتمع بيلهف منى 5 جنيه يوميا يبقى فى الشهر المجتمع بيحصل منى 150 جنيه بيعمل ايه بيهم المجتمع ده؟؟؟؟
اقولك
بيدفعها لحضرتك لحضرتك عشان
تتعلم ببلاش
و علشان تتعالج ببلاش
و تركب مواصلات مدعمه
و تاكل عيش مدعم
و تركب عربيه
و تحط بنزين مدعم
و بتدفع منها مرتب للموظفين بتوعها 150 جنيه هى بالظبط مرتب موظف ما فى الدوله اول تعين ليه شوفت بقى
شوفت المجتمع واخد حقه منى تالت و متلت بس انا زعلان من المجتمع شويه وواخد على خطرى لان المجتمع بيصرف شويه من الفلوس اللى انا بادفعهالوا على شويه لوح سخيفه كاتبلى عليها ممنوع التدخين و بيعلق العلامت دى فى الاماكن العامه اللى انا باردوا بساهم فيها بفلوسى اللى باحرقها المجتمع بيطردنى من المناطق العامه و المواصلات العامه وبيجبرنى ان اان ادخن فى الشارع
ده حتى مول سان استيفانو منعوا فيه السجاير
قال ايه يقولك من حقك ان تدخن فمن حقى ان استنشق هواء نقى
بجد عباره تحرق الدم تمام
مدمن المخدرات صرف مبلغ محترم على متعه هو بيحبها و كمان جزء كبير من صحته اللى هى ثروه المجتمع الفرق بينه و بينى حاجتين
اولا ان مدمن المخدرات مابيدفعش ضرايب لا هو و الا تاجر المخدرات
ثانيا ان المجتمع مش بيعتبرنى مريض زى مابيعتبره مريض المجتمع بيعاملنى على انى كلب جربان لازم يبنعزل حفاظا على صحه الاخرين
الاخرين هه اللى انا و غيرى من المدخنين تقريبا بنصرف عليهم
اما المدمن المجتع بيعامله على انه مريض و بيدخله مسشتفيات عامه ويقوله يا حبيبى يالى بقيت مدمن ده انت مسكين و غلبان تعالى نعالجك بالفلوس اللى دافعها (احمد عبدالسلام (انا يعنى
لما بركب اى طريق صحراوى بدفع كارته ضريبه عشان تحسين الطريق اللى انا ماشى عليه بيس
لكن الضريبه اللى بيدفعها المدخن مافيهاش فيها مليم بيتصرف على برامج اعاده التأهيل و توعيه المجتمع
يا جماعه
المدخن ده مواطن مثالى من حقه انه يدخن و يعملولنا مناطق مخصصه للتدخين بكراسى محترمه
و قاعده مريحه
و مزيكا شغاله
اه مزيكا المدخن ده مابيشحتش من حد المدخن ده قاعد بفلوسه و لو بطل تدخين تأكدوا ان غير المدخنين هما اللى حيبقوا خسرانين
المدخن شمعه تحترق من اجل المجتمع بس يا خساره المجتمع مابيطمرش فيه
No comments:
Post a Comment